புதிய பதிவுகள்

வணக்கம்

கவிதை, சிறுகதை, திரைக்கதை என பல்வேறு தளங்களில் இயங்கி வரும் ஆத்மார்த்தியின் பிரத்யேக இணையதளத்திற்கு அன்புடன் வரவேற்கிறோம்!

Visitors Counter

தங்க மீன்கள் நல்ல படம் தானே அய்யா..?

கடந்த ஒரு ஆண்டுக்கும் மேலாக தங்க மீன்கள் படத்தின் முன் கூறல் ஒன்று தொடர்ந்து கட்டமைக்கப் பட்டு வந்தது கவனிக்கத் தக்கது.அதாவது நாமெல்லாரும் ஒரு உலகத் தரமான அனுபவத்திற்காகக் காத்திருக்கிறோம்.காணவிருக்கிறோம் என்பதே அது.அந்த எதிர் பார்ப்போடு தான் அந்தப் படத்தைப் பார்க்கச் செல்கிற பலரில் ஒருவனாக நானும் சென்றேன்.எனக்கு ஆரம்பம் முதலே அந்தப் படத்தில் என்ன சொல்லப்படுகிறது என்பதில் குழப்பம் இருந்துகொண்டே இருந்தது.

ராம் தன் மகள் மீது அன்பாக இருக்கிறார்.அவள் மீது பேரன்பாக இருக்கிறார்.அவள் மீதே பேய்த்தனமான அன்பாக இருக்கிறார்.அந்த மகள் குழந்தைகளில் ஒருத்தியாகத் தான் இருந்தாலும் கூட "என் பொண்ணு என் பொண்ணு என ஒரு தகப்பன் சொல்வது தான் படம் முழுக்கவே தொனிக்கிறது.பிரச்சினை டெஸிபல் தான்.அடுத்தவன் காது கிழியும் அளவுக்கு என் பொண்ணு என ஒரு தகப்பன் சொல்வதும் அதைக் கவிதை என்று நிறுவ முயல்வதும் ஒட்டவில்லை.ஒட்டாது.ராம் கதாபாத்திரம் தனது பெண்குழந்தையை விட சிறுபிள்ளைத்தனமான அப்பாவாகத் தான் தோற்றமளிக்கிறது.

கதாபாத்திர நியாயம் என்பது துளியும் அற்ற படத்திற்கான உதாரணம் தங்கமீன்கள்.character justification
துண்டு துண்டாக துக்கடா துக்கடாவாக இந்தப் படத்தின் எல்லா கதாபாத்திரங்களுக்கும் இடையே சுய நியாயங்களை உருவமைக்கிறார் ராம்.அவை கதையின் பொது ஓட்டத்திற்கு எதிராகவே ஆகிப்போவது கொடுமை.ஒரு படத்தை ஒரு பார்வையாளன் எல்லாப் பாத்திரங்களின் ஊடாகப் பார்க்கவே இயலாது.எதாவது ஒரு பாத்திரம் என பொதுவாக சொன்னால் கூட மையமான ஒரு பாத்திரத்தின் மீது தான் டிராவல் அதாவது பயணப்பட இயலும்.அப்படிப் பயணிக்கையில் மையக்கதை அதில் அந்தப் பிரதானப் பாத்திரம் அடையக் கூடிய சிதைவுகள் அந்தப் பிரதானப் பாத்திரம் தான் அடையக் கூடிய மாற்றங்கள் என சேகரித்தபடி அமையும்.
இதன் ஆதார விதி என்ன என்றால் இந்த இரண்டும் மையக்கதை மற்றும் பிரதான பாத்திரம் ஒன்றுக்கொன்று வஞ்சகம் செய்துகொள்ளவே கூடாது என்பது.இவை ஒன்றுக்கொன்று ஏற்படக் கூடிய நுட்பமான இழையை அறுக்காமல் இருக்கவேண்டியது அவசியம்.இதனை மீறுவது இயலாது.மீறிப் பரீட்சிக்கிற படங்கள் என்னவாகும் என்பதற்குத் தான் தங்க மீன்கள் ஒரு உதாரணம்
பிரதான பாத்திரத்தை கொஞ்சமும் சட்டை செய்யாமல் எல்லாப் பாத்திரங்களும் தங்களுக்கென்று தனி நியாயங்களை கொண்டிருப்பது.
ஒருபோதும் பிரதானபாத்திரத்தின் மீது பயணிக்கவே அனுமதிக்காது.


இந்தப் படத்தில் வரும் எல்லாப் பாத்திரங்களும் அது அது தனக்கான நியாயங்களைக் கொண்டிருக்கிறது.சரிதானே..?அப்பாவுக்கு அவர் நியாயம்..அம்மாவுக்கு அவர் நியாயம்.மனைவிக்கு அவர் நியாயம்.மகளுக்கு அவர் நியாயம்..என்று மேம்போக்காகப் பார்த்தால் தோன்றலாம்.ஆனால் அப்படி அல்ல.எல்லாப் படங்களிலும் கேரக்டர் ஜஸ்டிஃபிகேஷன் இப்படி இருக்குமா என யோசித்துப் பார்த்தால் விளங்கும்.
இந்த அவரவர் நியாயம் எப்படி இருக்க வேண்டும் என்பது தான் பிரச்சினையே...
கதாபாத்திரங்களுக்கு இடையிலான தனி நியாயங்கள் ஒன்றமைகையில் கதையின் நகர்வுக்கு எந்த வகையிலும் ஊறுவிளைவிக்காதவாறு அமைவது அவசியம்.அல்லாது போனால் கயிற்றில் கட்டப்பட்ட மாடு போலக் கதை நகர்வது போல் தோன்றினாலும் ஒரே இடத்தை சுற்றிச்சுற்றி வரும்.
இது தான் தங்க மீன்களின் பிரச்சினை.
ராம் பாத்திரம் அவரது மகள் செல்லம்மா பாத்திரம்..இவை இரண்டும் தனித்தனி நியாயங்களைக் கொண்டிருக்கின்றன.ஆனால் அதைப் பார்வையாளனின் நம்பகத்தில் சென்று ஆணி அடித்தாற்போல் செருகாமல் சோற்றுப்பசையைத் தடவி ஒட்டினாற்போல் ஆக்குகிறார் இயக்குனர்.மற்ற பாத்திரங்களின் அனைத்துவகையான நியாயங்களுமே ஒழுங்காக இதன் கதையோட்டத்திற்கு எதிரானதாக அமைந்துவிடுவது கொடுமை.
அவளுகெதுக்குடா ரெண்டு அம்மா..?
இது ஒரு வசனம் ராமின் அப்பா பேசுகிறார்.இது படத்தின் மையக்கதையை சுக்கு நூறாக்குகிறது.
ஏங்க நம்மகிட்டே இல்லாத பணமா..?அவனை நீங்க வரச்சொல்லுங்க..
இது இன்னொரு வசனம் ராமின் அம்மா பேசுகிறார் இங்கேயும் கதை நொறுங்குகிறது
நாய்க்குட்டி வாங்க காசு தரமாட்டேன் என மறுக்கும் அவரது தங்கை அடுத்த வசனமாக
"இது எங்கண்ணன் வாங்கித் தந்த சாக்லேட்டு"
என்று அதனை கையில் கொண்டு உருகுகிறார்.
இப்படி எல்லா கேரக்டருமே நல்லவர்களாக அமைவதும் தனக்கென்று தனித்தனி நியாயங்களைக் கொண்டிருப்பதும் படத்தின் மையக்கதைக்கு முற்றிலும் விசுவாசமற்று இருக்கின்றது

மொத்தத்தில் ராமின் தங்க மீன்கள் அவரது நடிப்பு நன்றாக இருந்தாலும் அவரது மனையாளாக வருபவரின் நடிப்பு மிகையற்று இருந்தாலும் அந்தப்பெண் குழந்தையின் நடிப்பு மிக அற்புதமாக இருந்தாலும் அப்பா அம்மா எல்லோரின் நடிப்புமே நன்றாக இருந்தாலும் கூட திரும்பத் திரும்ப ஒரே இடத்தில் சுழலும் திரைக்கதையாக்கம் மிகப் பெரிய பலவீனம்.இந்தப் படத்தை வித்யாசமாக விமர்சிப்பார்கள் என நினைக்கிறேன் அதாவது நல்லா இருக்கு.ஆனா பிடிக்கலை.என்றோ பிடிச்சிருக்கு ஆனா நல்லா இல்லே என்றோ விமர்சித்தபடி கலைவது போலத் தோற்றமளிக்கிறது.படத்தின் எல்லாக் காட்சிகளின் மொத்த அர்த்தமும் ஒன்று தான்.

தனித்தனித் தீவுக்கூட்டக் காட்சிகள்.ஒன்றுக்கொன்று பொருந்தாத பல நல்ல சீன்களின் தொகுப்பு இது.
தங்க சீன்கள்.

Last Updated (Saturday, 31 August 2013 08:01)